దేశంలో గత ఏడాది వచ్చిన మొత్తం పెట్టుబడుల్లో 25 శాతం ఆంధ్రప్రదేశ్కే వచ్చాయని M. Sribharat వెల్లడించారు. “స్పీడ్ ఆఫ్ డూయింగ్ బిజినెస్” విధానంతో రాష్ట్రం విజయవంతంగా ముందుకు సాగుతోందని ఆయన పేర్కొన్నారు.
బుధవారం విశాఖపట్నం ఉత్తర నియోజకవర్గంలోని 42, 43వ వార్డుల క్లస్టర్లో నిర్వహించిన TDP Mahanaadu 2026 కార్యక్రమంలో ముఖ్య అతిథిగా ఎంపీ శ్రీభరత్ పాల్గొన్నారు. ఈ సందర్భంగా మాట్లాడుతూ యువతకు రాజకీయాల్లో, పబ్లిక్ పాలసీలో మరింత అవకాశాలు కల్పిస్తామని తెలిపారు.
20 నుంచి 25 ఏళ్ల మధ్య వయసున్న యువతకు రాజకీయాల్లో పెద్దపీట వేయనున్నట్లు స్పష్టం చేసిన ఆయన.. భవిష్యత్తులో మహిళా బిల్లు అమలులోకి రావడం ఖాయమని అన్నారు. మహిళలు పెద్ద ఎత్తున రాజకీయాల్లోకి రావాలని, వారిని తెలుగుదేశం పార్టీ ఆహ్వానిస్తోందని పేర్కొన్నారు.
అలాగే Nara Lokesh టీడీపీ కార్యనిర్వాహక అధ్యక్షుడిగా బాధ్యతలు స్వీకరించడం శుభసూచకమని చెప్పారు. లోకేష్ నాయకత్వంలో పార్టీ మరింత బలపడుతుందని విశ్వాసం వ్యక్తం చేశారు.
విశాఖపట్నం పార్లమెంట్ పరిధిలో మొత్తం 82 క్లస్టర్లు ఏర్పాటు చేసినట్లు తెలిపారు. ప్రతి క్లస్టర్లో మహానాడు ప్రత్యక్ష ప్రసారాన్ని వీక్షించేందుకు భారీ ఎల్ఈడి స్క్రీన్లు ఏర్పాటు చేశారని చెప్పారు. రాష్ట్రవ్యాప్తంగా 1,850 క్లస్టర్లలో మహానాడు సమావేశాలు నిర్వహిస్తుండగా, విశాఖపట్నంలోని 81 క్లస్టర్లలో వర్చువల్గా జరిగిన కార్యక్రమాల్లో టీడీపీ నాయకులు, కార్యకర్తలు భారీ సంఖ్యలో పాల్గొన్నారు.
